اشهد يا نيل

اشهد يا نيل ع الأصل والصورة
الأصل برده سليم والصوره مكسورة

اشهد يا نيل..أصل الحكايه..لعبة صبايا
اللعبه خابت..وفضلوا الصبايا.. يبكوا حزانى
والدمعه يانه..صعبت عليهم..مسكوها تاني
سألوا الجنايني..عن لعبه غيرها
قام هز راسه.. وبعلو صوته..قال يا صبايا
اللعبه خلصت.. والدور عليكو..تبنوا بإيديكو
والبيت هيكبر.. طوبه بطوبه
جريوا الصبايا..نسيوا الجنايني..والزرعه خابت
رجعوا حزانى..والدمعه يانه.. صعبت عليهم
قام الخواجه..ولّع سيجاره
وقال يا صبايا.. الخير معايا
مدّوا إيديكو..اجروا ورايا
وسنين بتجري.. والبنت تجري.. وسط الصبايا
بين الحواري .. بين الزوايا
تعبت يا عيني..وقفت سابوها..فاتها الخواجه
مرت ليالي.. والبنت واقفه..ورجعوا الصبايا
ضحكت عنيها.. مدّت إيديها..ردّوها تاني
تاري الخواجه.. حالف عليهم.. ما يعودوا تاني
إلاّ ومعاهم. خبر البنيّه
الدّمعه سابت..زي البنيّه ف يوم ما هانت
وقفوا الصبايا.. والفكر حاير
خير الخواجه؟؟ والاّ البنيّه؟؟
ولحد يومنا.. لسّه الخواجه.. م الخير بيسرق
والبنت تبكي وسط الصبايا

اشهد يا نيل