هنا يا ابـن بلدي

هنا يا ابن بلدي نهارك سعيد

ويومك دا عيد
ولو حالنا عاجبك...وباسط سعادتك
هنرجع نعيد ف الكلام من جديد

***
هنا يا ابن بلدي هتسمع وعود
وعود بالوعود
وعودك تخلي لجودك وجود
وعود زي بكره كمان كام سنة
هتسمع وعود
نهارك سعيد

***
هنا يا ابن بلدي مهد الحضاره
دكاكين دعاره
وناس ع المحاره
بتشقى وتعرق عشان تلقى قوت
وغيرهم يفوت..بلمسة شطاره

***
هنا يا ابن بلدي حياتك أمان
وموتك كمان
ونومك لوحدك ..جوّه بيتك جنان
لازملك مشاركه..شوية مباركه
ف برش اللومان

***
هنا يا ابن بلدي حياتك بلاش
وموتك بلاش
تعدّي على الدنيا من غير قلق
لأنك ما تسوى ف نظرنا الا شاش
ومترين قماش

***
فلو حالنا عاجبك
وباسط سعادتك
هنرجع نعيد ف الكلام من جديد
...هنا يا ابن بلدي

زي النهارده

i dh اهداء الى الرائع طارق عميره

زي النهاردَه مِن سنَه
كنّا في طرِيق ..
مالهُوش مَلامِح
مافيش فيه لون في الارض طارح ..
ماشيين نخبّط ..
ركَبنَا سايبَة
والدنيّا ضَلمة ..
مفِيش في بكرة أذان جديد
ونَهار جِديد
و لا دِيك يصِيح والصُبح صابِح
**** ..
وزيّ بكرَة مِن سنَة
حالي انقَلبْ
والنُور شِديد
والدم في عروقي
وصل أبعَد ورِيد
وشعُور غرِيب
مخلّي قلبي سعيد
أو كان سعيد
وكأنّه عيد
م الفرْح خوفي يزيد
خوف من سنه
أوّلها فرْح جديد
****
عدّت سنه
ولسّه تايه في الطريق
لكن لوحدي
وغيري شاف مليون صديق
ولسّه شايف من بعيد
النور شديد
والدم يجري في الوريد
**
معقول سعيد؟
وكأنّه عيد؟!
لسّاك بتحلم بالجديد؟
م بكره زيّه من سنه
كان يوم جديد
من غير جديد

الطرشقـمان

قرّب يا صاحبي اسمع غناوي الطرشقمان
قرّب وهات كل اللي شاف حرمان
الطرشقمان على قد الحال
شايل هم يهد جبال
بنهار وليل دايما شغال
وياريته قادر ع العيشه
حجرين شيشه..
ليلاتي فيهم راحة البال
ما زيّه زي كل الناس
بيحلم حلم ماله اساس
ولو فكّر ف يوم ينطق
هيبقى حاله زي الموت
وغيره يفوت
ف حلم زمان
مالوش غير نعمة النسيان
***
قرّب يا صاحبي اسمع غناوي الطرشقمان
***
الطرشقمان ياما لف وطاف
و م البشر ياما شاف أوصاف
حياته بين النون والكاف
ألوان صورتها حروف الموت
كلامها سكوت..قدر موقوت
طيور الشرق طارت بيه
بعيد عن ناسه عن أراضيه
فاكرها ناويه يوم تداويه
كلام فاضي....
ما غيره مات..وقطر الغربه فوقه فات
وغيره يفوت
ف حلم زمان
مالوش غير نعمة النسيان
***
قرّب يا صاحبي اسمع غناوي الطرشقمان
***
الطرشقمان عاش عمر قليل
وبرغم سنّه الحمل تقيل
مسجون ف سجن نهاره ليل
مع انه عايش بين الناس
وحلمهم ف عنيه ينداس
أكيد خايف
وإيده ع الحزام ناسف
ف وسط ميدان
وغيره يفوت
ف حلم زمان
حرام يا زمان
قرّب يا صاحبي اسمع غناوي الطرشقمان
قرّب وهات كل اللي شاف حرمان

تعالى يا صاحبي

تعالى يا صاحبي ف يوم عيد ميلادك
تعالى نراجع ونقرا اللي فاتك
ما ضيك...ذكرياتك
ملاحِم حياتك
تعالى يا صاحبي نجيب م البدايه
بداية الحكايه
حكاية بلدنا اللي ليها الرّوايه
كبيرها حاميها
حاميها ماليها
ماليها ديابه بتنهَش ف لحم العيال الغلابه
ودمّك يا طابا
على الأرض يجري
ويِسري ويروِي
غِطانك يا غابه
حصادك بنوك الخواجه ماليها
وِدا حساب حاميها
حاميها ماليها ...ماليها ديابه
بتنهش في لحم العيال الغلابه
وتبكي يا صاحبي خيوط الرّبابه
على كفوف حاميها
ودمعة عنيها بتشكي لطابا
وطابا يا عيني
بتشكي لرب العباد مِ الّلي فيها
وربّك فايتها على إديه بتنزف
اكيد مش ناسيها
ودي إدين حاميها
من الخير بِتغرف
وتسقي وتِعلِف
كلاب الحراسه
تعالى يا صاحبي.....
............

صباح الفل

صبـاح الخير يا أهل الخير
وخيـر لمّا صبَحنا بُه
على إديكم يا أهل الخير
نَدَهنا لُه فتح بـابـُه
دخـلنـا وكـان غرضنا الخير
صبَحنا بخيره احبابُه
صباح الفُل يا كبيرنا
رجالك قسّموا خيرنا
خِلِصنا خلاص
سنين فاتت ماليها الخوف
ورب الكون أكيد شايف
سايبكم تِنهبوا ف خيرنا
صباح الفل
ويكمل يوم وراه أيّام
نِعَزّي ف حلم م الأحلام
وحلمي اسيب لحلمي اساس
اساس ابني عليه كلمه
وحلم النّاس
على سطر القلم ينداس
ويكبر جوّه حلمي الخوف
ما زيّه زي حلم النّاس
بِـبَـانُه عليها كام ترباس
وشمع احمر وسلك نحاس
وتاييه الكلمه بين الناس
وناس تاييه وناس تِنداس
ولو فكّرت يوم تنطق
تلاقي الكلمه بايعه خلاص
وحالنا زيّيه زي الموت
خِلصنا خلاص
قدَرنا تكون فِ أقدارنا
كبير الكل يا كبيرنا
كلامك سيف على الرّقَبَه
سايقنا والعيال راكبه
على اكتافنا..
وكلمه(لأ) ما تسمعشي
كلامك هو دستورنا
صباح الفل يا كبيرنا
وحاضر قبل ما تقولها
هشوف لي كمان بلد تانيه
واعيش واحلم لناس تانيه
وتفضل برضه يا كبيرنا
كبير بينا ومن غيرنا
صباح الفل

على بـاب حـارتـنا

على باب حارتنا والجيران متجمّعين
تدخل تلاقي الفَرح يملى كل عين
وعم عبدو وعم جرجس في الحسين
يوم الخميس بيفطروا....ومسهّرين
على باب حارتنا عين (سبيل) للعطشانين
ترويك وتروِي كل بيت مِ المحرومين
على باب حارتنا كل يوم تِلقى فَرَح
واتنين في كوشه ومبسوطين
ولو انت راجع م السّفر تلقى العنين
بتُحضُنَك قبل الإدين..سلامـات
وقرّب بِلّ م الورد الكاسين
شربـات فَرَحنا بيوم رجوعك م السفر
وان كنت ناسي نفكّرك بالمشتاقين
على باب حارتنا
****
على باب حارتنا تشوف عنيك برجين حمام
وعيال بتتنطّط..ما تخافش ادخل
هتلاقينا..مادّين إديـنا بالسلام
على باب حارتنا ما تلاقيش للكدب صوت
ولا قفل واحد هتلاقيه على البيوت
المولى حارس والجيران متجمّعين
تدخل تلاقي الفرح يملى كل عين
على باب حارتنا

Dr.na3san

تحت السطر 1

إذا انعدمت الأخلاق فلا يُعاقب المخطؤون...فوجود الأخلاق هو المعيار الحقيقي للصواب والخطأ,وانعدامها يعني انعدام الخطأ,فكل ما يُفعل مُباح,وبالمقابل فلا حمدَ لفعلٍ حميد فانعدام الخطأ يعني بالضروره انعدام الصواب,ومجتمع انعدم فيه معيار الصواب والخطأ يصبح التعامل بين أفراده من منطلق الحاجه,والحاجه تقبل النفع والضرر,والنفع يقبل السعاده والضرر يجلب الحزن,وللحزن جبهتان إحداهما المقاطعه لسبب الضرر ويلحق بها الانتقام,والأخرىترمي الى اللّوم والّلوم يتوقف على مقدار الضرر,والانتقام واللّوم حدّي الخُلُق, فكيف نزعم انعدام الأخلاق؟؟؟