حان الأوان لإزالة القناع

تتناثرالضحكات وتنهال الورودعلى المهرج(البلياتشو)في السيرك ويقابل اخونا كل موجات التصفيق الحار بنفس الوجه الضاحك
الجامد..حتى اذاقوبل بالإستهجان والاستنكار فانه لن يجرؤعلى تغير تلك الابتسامه(فلوأزالهاانتهت مهمته على مسرح الحياة)على
اساس يعني ان الحياه للواحد مننا هيه الشغل اللي بياكل من وراه عيش..ماعلينا..المهم انا كنت هقول ايه بقى؟
اه افتكرت...كنابنقول قناع كده وكلام كبيرطيب ازاي وليه وبتاع ايه يعني نشيل القناع داوالاهوه فين القناع يعني..هم كل الناس
بلياتشو في السيرك؟!حاشا وكلا و اعوذبالله من تلك المقوله..ولكن للأسف فالجميع في سرك الحياه مهرجين..ازاي بقى؟
صدقوني انا بطلت اشرب المخدرات بكل انواعها يعني مش يهييس ولابهرتل ولاحتى بقيت عجوز وبخرّف, بس عايزحد يقولي اني غلطان(ياريت اكون غلطان)طيب..يعني لما الحاج حسين يقفش الواد حماده وهوبيشرب سجايرفي الحمام ويطلع عينه م الضرب وفين يوجعك..يعني هوه ابونا الحاج بيضرب الواد ياعيني عشان بيشرب سجاير؟!لاطبعا بس هو بيعمله يبقى حويط ولما يعمل حاجه غلط يعرف يداري عليها كويس!!بس بطريقه غير مباشره
طيب ولما الحاجه فتحية تزنق البت سوسو مع الواد ابن الجيران في بيرالسلم وتنزل على دماغها بالشبشب لحد ماتقول حقي برقبتي
ومش هعمل كده تاني يا امي..دا اذا الواد ابن الجيران ماخدش نصيبه هو كمان من البهدله..يعني والنبي كده يعني هيه بهدلتهم عشان.. شرف البت زي عود الكبريت ويعني على اساس انها لحقتها قبل ماتغرق وتنزل في ظلمات الانحدار الاخلاقي؟والايعني عشان خايفه ان البت لما سمعتها تنتشر بين الناس ما يجيلهاش عرسان؟ لاطبعا بس ستنا الحاجه قصدها تقول للبت انها لما تحب تعمل راندفوو تكون مفتّحة وتختار المكان اللي ماحدش يقدر يزنقها فيه..ويعني برده تفهمها فوق البيعه ان الحب شمعه لازم الواحد مننا يداري عليها..بس هيه بتوصل المعلومه بطريقه غيرمباشره
والا يعني لما يطلع البيه المسؤول الكبير على التلفزيون والذي منّه ويجعجع ويقول ياناس كفايه حرام عليكو ارحمو الحكومه وكفايه عيال
احنا بنزيد كام مليون في السنهوكمان شويه مش هنلاقي اكل ناكله يعني من الآخر كده لمّوا نفسكو شويه وياريت تشدوا الحزام شويه
..يعني هوه بيفكر في مصلحة البلد يعني؟! والا على اساس انه خايف على مستوى المعيشه للفرد في وطننا الغالي الحبيب؟ لا طبعا بس
اخونا البيه المسؤول الكبير عارف انه لما الناس تزيد مصاريفهم هتكتر وكلنا كمان عارفين كده بس اللي مش عارفينه او مطنشينه انه لما مصاريف البلد تزيد السمسره اللي بيسمسرها البيه واللي زيّه طبيعي يعني هتنقص وبالتالي يتخرب بيته لما حسابه في بنوك سويسرا ينزل شويه ويعني من الآخر ارحمو الناس اللي فوق وما تكونوش انتو و الزمن عليهم...
ها ...بس كفايه انا اساسا مش ناوي اشيل القناع لاني اساسا مش فاهم أي حاجه من اللي انا كاتبه
ومن الآخر انا دماغي وجعتني من كتر الكلام ف الفاضي
والسلامو عليكو بقى...