طبق اليوم(سياسه)بالبهارات

طبق اليوم هو (السياسه)وعليها بعض البهارات واليكم المقادير

وحتى تكون سياسي ماهر ومن اخوانا اياهم اللي ما نقدر ابدا نطلق عليهم لقب سابق الا لما يريد المولى وملك الموت (بعيد عنكم) ياخد الأمانه,لازم بقى تتبعوا كل الخطوات وبكل دقه وبكل اخلاص

اولا لازم تحضر شويه مكر وخباثة عشان دول هنحتاجهم كمان شويه

ثانيا لازم يجيب نجيب نص كيلو قله أدب لزوم القعدة والرجاله

ثالثا المفروض يكون معانا كيسين كذب بس من اللي قلبك يحبهم

رابعا معلقتين (حجم ملعقة الشاي)من الكلام الحلو

وربع معلقه كبيره من الضحكات الخبيثه ايّاها

خامسا تلاتة كيلو نصب واحتيال ولو في خبره سابقه في كام عمليه ما يضرش

سادسا تحضر طبق من البلطجيه والتابعين اياهم عشان لو فيه انتخابات او مظاهرات الامر ما يسلمش

سابعا نخلط كل اللي فات ونسويه على نار هاديه

نسكب الخليط في وعاء يحتوي بعض القصص والامجاد عن تاريخك الثوري وحياتك في المعتقلات(طبعا حياتك دي انت حر فيها تقول عنها اللي انت عايزه ان شاالله لو كنت عمرك ما تعرف المعتقلات دي شكلها ايه) بس اهو شيء لزوم الشيء

ثامنا نضع الخلطه في الفرن ونصبر عليها شهر وبعدين نطلعها ونحط على الوش شويه نفاق

تاسعا قبل ما اقدم الوجبه للمعازيم(وطبعا الكل عارف مين المعازيمما تنساش ترش حواليها ومن الزوايا الاربع كميات متفاوته من الخدمات ولو البسيط منها)وطبعا الخدمات دي ليها ناسها برضه

عاشرا ودي آخر خطوه عشان نخلص بقى من الليله دي

ما تنساش تملى الوجبه الجميله دي بالسم وياريت يكون تأثيره بطيئ علشان ندرس تأثريه على المعازيم اياهم

وبالهنا والشفى وعقبال كل سياسي وانتوا طيبين